Intervista është një nga përvojat më stresuese që mund të përjetojmë gjatë jetës sonë profesionale. Në njëfarë mënyre, emocionet mund të jenë të dobishme, sepse përgatisin trupin tonë për të dhënë performancën më të mirë dhe na mbajnë vigjilentë. Megjithatë, ato mund të punojnë edhe kundër nesh, duke shkaktuar reagime të padëshiruara si zë i pasigurt apo bllokim mendimi.
Thuhet shpesh se një punëdhënës formon përshtypjen e parë për dikë brenda pak sekondash. Të dukesh i/e sigurt në një intervistë ndikon pozitivisht në mënyrën si perceptohesh.
Personat me vetëbesim kanë më shumë gjasa të mësojnë shpejt, nuk hezitojnë të bëjnë pyetje dhe kanë potencial për të marrë iniciativa dhe për të marrë vendime vetë. Një punëdhënës do të ketë më shumë besim për t’ju ofruar vendin e punës nëse ju paraqiteni i/e sigurt në vetvete.
Ky artikull trajton disa strategji që mund t’ju ndihmojnë të ndiheni dhe të dukeni më të sigurt gjatë një interviste.
1. Përgatituni mirë
Është e qartë që përgatitja paraprake zvogëlon mundësinë për t’u përballur me situata të papritura.
Marrja e kohës për të menduar për pyetjet që mund t’ju bëhen dhe mënyrën si do të përgjigjeni, ju ndihmon të ndiheni më të sigurt. Disa intervista janë më të lehta për t’u përgatitur se të tjerat.
Intervistat e bazuara në aftësi personale (strength-based) synojnë të zbulojnë pikat tuaja të forta dhe mund të jenë më të vështira për t’u parashikuar. Ndërsa intervistat e bazuara në kompetenca përfitojnë shumë nga përgatitja, sidomos duke përdorur teknikën STAR.
Pavarësisht llojit të intervistës, është thelbësore të hulumtoni organizatën dhe të kuptoni plotësisht kërkesat e pozicionit. Kjo jo vetëm që rrit vetëbesimin tuaj, por tregon edhe interesin tuaj serioz ndaj punës.
Gjithashtu, mund të ulni ankthin duke planifikuar aspektet praktike si vendndodhja, mënyra e udhëtimit dhe koha e nisjes. Arritja më herët ju jep mundësi të qetësoheni dhe të përqendroheni para intervistës.
Pa dyshim, përgatitja ju bën të ndiheni më të sigurt dhe rrit shanset për të fituar vendin e punës.
2. Vishuni me vetëbesim
Zgjidhni një veshje të përshtatshme për intervistë në të cilën ndiheni mirë dhe të sigurt. Pamja juaj ndikon drejtpërdrejt në përshtypjen e parë.
Pas pandemisë, veshja është bërë më pak formale, por zakonisht stili business ose smart casual është zgjedhja më e sigurt. Nëse keni dyshime, shikoni rrjetet sociale të kompanisë për të kuptuar stilin e tyre.
Një paraqitje e rregullt dhe profesionale tregon seriozitet dhe dëshirë për të lënë një përshtypje të mirë.
3. Mos harroni të buzëqeshni
Buzëqeshja është një gjuhë universale që krijon ndjenja pozitive dhe rrit vetëbesimin. Përshëndetni çdo intervistues me buzëqeshje dhe kontakt me sy për një fillim të shkëlqyer.
4. Kontakti me sy
Nuk ka rregull të prerë, por përpiquni të mbani kontakt me sy pak më gjatë kur dëgjoni sesa kur flisni. Nëse kjo ju duket e vështirë, praktika do t’ju ndihmojë shumë.
5. Shtrëngimi i dorës
Jo çdo intervistues do të ofrojë dorën, por duhet të jeni të përgatitur nëse ndodh. Dy elemente janë kyçe: forca dhe kontakti me sy.
Një shtrëngim i qëndrueshëm (jo i tepruar) tregon vetëbesim. Kombinojeni me kontakt me sy dhe buzëqeshje për një përshtypje të mirë.
6. Qëndrimi i trupit
Gjuha e trupit tregon shumë për mënyrën si ndiheni.
Qëndroni drejt, me shpatullat pas dhe pak të përkulur përpara kur dëgjoni, për të treguar interes. Shmangni kryqëzimin e krahëve apo këmbëve, pasi mund të japë sinjal mbylljeje.
Kujdes nga lëvizjet e pavullnetshme si tundja e këmbëve, prekja e fytyrës apo lojërat me duar. Vendosni duart në prehër dhe këmbët në tokë për më shumë kontroll.
Nëse nuk jeni të sigurt, pasqyroni gjuhën e trupit të intervistuesit në mënyrë natyrale.
7. Komunikimi verbal
Nëse flisni shumë shpejt, mund të tregoni nervozizëm. Është në rregull të merrni një moment për të menduar para se të përgjigjeni.
Teknika STAR ndihmon për përgjigje të strukturuara dhe të qarta, duke shmangur devijimet apo harresat.
Vëzhgoni tonin dhe stilin e intervistuesit dhe përshtatuni me të. Disa intervista janë më formale, të tjera më të relaksuara, prandaj fleksibiliteti është i rëndësishëm.
Nëse mendoni se nuk jeni përgjigjur mirë, buzëqeshni dhe kërkoni mundësi për të shtuar diçka më shumë.
8. Praktikoni vetëbesimin
Është normale të mos ndiheni gjithmonë të sigurt, por mund të mësoni ta krijoni këtë ndjesi kur ju duhet.
Reflektoni mbi arritjet dhe aftësitë tuaja. Fokusohuni te ajo që dini dhe mund të bëni.
Vizualizimi është një teknikë shumë e fuqishme. Imagjinoni veten në atë rol, duke performuar me sukses dhe vetëbesim.
Para se të dilni nga shtëpia, qëndroni para pasqyrës, drejtohuni, buzëqeshni dhe thoni me bindje: “Unë mundem”.
Në përfundim
Të dukesh i/e sigurt bën një ndryshim të madh, pavarësisht se si ndiheni brenda. Vetëbesimi nuk do të thotë arrogancë.
Përdorni kombinimin e këtyre teknikave dhe përpiquni të ulni stresin një ditë para intervistës. Frymëmarrja e thellë ndihmon shumë, ndërsa buzëqeshja dhe kontakti me sy janë gjithmonë në favorin tuaj.
Shumica e njerëzve përjetojnë emocione para intervistës, por kjo nuk do të thotë që nuk do ta fitoni vendin e punës.
Burimi : 8 Top Tips for Interview Confidence
